22.10.2024 Großer Traithen 1852 m, Kleiner Traithen 1723 m, Mangfallgebirge

Heit amoi auf boarisch, wei unsa scheena Dialekt a a bissl pflegt wern muas!

Zerscht samma aufs obere Sudlfoid zur Walleroim gefahrn. Vo da samma dann losganga und scho boid hamma den erstn Gipfi ghabt, an Vogelsang (1563m), mit an scheena Blick obi. Dann samma weida aufm Steig durch d Latschn zum Kloana Traithen. Am Fuaß vo eam is dann glei gach aufiganga.Mia hamm uns sauba blogt und a a pormoi am Drahtseil aufiziang miassn. Des war ganz schee steil, aba da Ausblick vom Gipfikreiz war a Wucht.
Jetz samma weida Richtung Endziel, an Großn Traithen. Boid warma am Felloimsattl und vo da gehts auf am sausteilen und baazigen Steig nauf zum Gipfe. Den hamma dann an no gschafft. Mia warn ganz schee hi, aber hamm uns sakrisch gfreit, dass ma obn warn. Nach a gscheidn Brotzeit samma wieda obigstign zum Felloimsattel. Wei ma aba nimma an gleichn Weg zruck woitn, samma de steile Skiabfahrt zur Rossgassn abi.
Mei Liaba, do hots uns alle nomoi sauba gschlaucht. Baatz, glatte Stoana....rema ned drüba.
Jedenfois samma heil bei da Walleroim rauskemma. Do hamma uns dann an Kaffä, an Kuachn, oda a Suppn und a Hoibe kafft. Des hamma uns heit wirkli vadient ghabt.
Aba schee wars, s Weda hot ghoitn und a Gaudi hamma a ghabt, so sois sei!

Tourenbegleitung, Text und Foto: Wolfgang Kraft
Foto: Eva Berger, Mike Martin

←Übersicht Tourenberichte